ആരാധനാലങ്ങളും ക്ലബ്ബുകളും സർക്കാർ ഭൂമി പതിച്ചു നൽകും;
ഭൂമി കൈവശമിരിക്കുന്ന കാലം മുതൽ പ്രവർത്തിക്കുന്ന സ്ഥാപനമായിരിക്കണം,കൃത്യമായ രജിസ്ട്രേഷൻ ഉള്ളതും കാലാകാലങ്ങളിൽ ഇത് പുതുക്കുന്നതുമായിരിക്കണം, ക്യത്യമായ വരവ് ചെലവ് കണക്ക് സൂക്ഷിക്കുന്നതാവണം ഇതടക്കമുള്ള നിബന്ധനകളോടെയാണ് ഭൂമി നൽകുന്നത്.
തിരുവനന്തപുരം : ആരാധനാലയങ്ങളും ക്ലബ്ബുകളും കൈവശം വച്ചിരിക്കുന്ന സർക്കാർ ഭൂമി പതിച്ചു നൽകുന്നു. മതിയായ രേഖകളില്ലാതെ 2008ന് മുമ്പ് കൈവശം വച്ചിരിക്കുന്ന ഭൂമിയാണ് പതിച്ചു നൽകുന്നത്. ഭൂമി എത്ര വർഷമായി കൈവശം വച്ചിരിക്കുന്നുവെന്നതനുസരിച്ച് നിശ്ചിത ഫീസ് ഈടാകും. ഇത് സംബന്ധിച്ച് റവന്യൂ പ്രിൻസിപ്പൽ സെക്രട്ടറിയുടെ ഉത്തരവിറങ്ങി.വർഷങ്ങളായി കൈവശമിരിക്കുന്ന ഭൂമിയാണെന്നും പതിച്ചുനൽകണമെന്നും ആവശ്യപ്പെട്ട് നിരവധി അപേക്ഷകളാണ് സർക്കാരിന് ലഭിച്ചത്. ആരാധനാലയങ്ങൾ, ക്ലബ്ബുകൾ, ചാരിറ്റബിൾ സൊസൈറ്റികൾ, ശ്മശാനങ്ങൾ, വായനശാലകൾ എന്നിങ്ങനെ നിരവധി പേരാണ് അപേക്ഷയുമായെത്തിയത്. ലാൻഡ് റവന്യൂ കമ്മീഷണർ ഇക്കാര്യം പരിഗണിക്കണമെന്നാവശ്യപ്പെട്ട് സർക്കാരിന് ശുപാർശ നൽകി.തുടർന്നാണ് മന്ത്രിസഭാ യോഗം ഇക്കാര്യം അംഗീകരിച്ചത്.
രേഖകളില്ലാതെ കൈവശം വച്ചിരിക്കുന്ന ഭൂമി പതിച്ചുനൽകുന്നതിന് കർശ്ശനമായ നിബന്ധനകൾ ഉണ്ട്. ആരാധനാലയങ്ങൾക്കും ശ്മശാനങ്ങൾക്കും നിലവിൽ കൈവശമിരിക്കുന്ന ഭൂമി പൂർണ്ണമായി പതിച്ചു നൽകില്ല. പകരം ആ സ്ഥാപനം പ്രവർത്തിക്കാൻ ആവശ്യമായ ഏറ്റവും കുറവ് സ്ഥലമാണ് അനുവദിക്കുക. പരമാവധി ഒരേക്കർ ,ബാക്കി ഭൂമി സർക്കാരിലേക്ക് ഏറ്റെടുക്കും. വാണിജ്യാവിശ്യങ്ങൾക്ക് സർക്കാർ ഭൂമി വിട്ടുകൊടുക്കുകയില്ല. എന്നാൽ കലാ-കായിക സംഘടനകൾക്കും മറ്റ് സ്ഥാപനങ്ങൾക്കും ഭൂമി അനുവദിക്കാൻ ഇനിയും കർക്കശമായ നിബന്ധനകൾ ഉണ്ട്. പരമാവധി 50 സെന്റ് ഭൂമിയാണ് ഇത്തരം സ്ഥാപനങ്ങൾക്ക് അനുവദിക്കുക.
ഭൂമി കൈവശമിരിക്കുന്ന കാലം മുതൽ പ്രവർത്തിക്കുന്ന സ്ഥാപനമായിരിക്കണം,കൃത്യമായ രജിസ്ട്രേഷൻ ഉള്ളതും കാലാകാലങ്ങളിൽ ഇത് പുതുക്കുന്നതുമായിരിക്കണം, ക്യത്യമായ വരവ് ചെലവ് കണക്ക് സൂക്ഷിക്കുന്നതാവണം ഇതടക്കമുള്ള നിബന്ധനകളോടെയാണ് ഭൂമി നൽകുന്നത്.ഭൂമി എത്ര വർഷമായി കൈവശത്തിലിരിക്കുന്നുവെന്നതിന്റെ അടിസ്ഥാനത്തിലാണ് ഭൂമിക്ക് വില നിശ്ചയിക്കുന്നത്.