ബൈബിൾ തീ വച്ച് നശിപ്പിക്കുന്നിതിനിടെ അഗ്നിബാധ രണ്ടു വീടുകൾ കത്തിനശിച്ചു

ടെക്സസ് : വീടിനു പിന്നാപുറത്തു ബൈബിൾ കത്തിക്കുന്നതിനിടയിൽ തീ ആളിപ്പടർന്നു യുവതിയുടെ സ്വന്തം വീടുംഅയൽവീടും കത്തിനശിച്ചു.മാർച്ച് 7 ഞായറാഴ്ച രാവിലെ 7.30നായിരുന്നു ഏവരെയും അമ്പരപ്പിച്ച സംഭവം. ടെക്സസിലെ സാൻ അന്റോണിയായിൽ സംഭവം.ബൈബിൾ കത്തിക്കുന്നതിനിടെ സ്വന്തം വീടിനും തീ പിടിച്ചപ്പോൾ ഉച്ചത്തിൽ ലുല്ലയുവതിയുടെ നിലവിളി കേട്ടുകൊണ്ടാണ് അടുത്ത വീട്ടിൽ താമസിച്ചിരുന്നവർ ഉറക്കമുണർന്നത്. തീ പിടിച്ച വിവരം ലഭിച്ചതിനെ തുടർന്നു സംഭവസ്ഥലത്ത് എത്തിച്ചേർന്ന അഗ്നിശമനസേനാഗംങ്ങൾ വളരെ പാടുപെട്ടാണ് തീ അണച്ചതെന്നു ഫയർ ക്യാപ്റ്റൻ ജോൺ ഫ്ലോറസ് പറഞ്ഞു.

തീ അണക്കുന്നതിനിടയിൽ രണ്ടു വീടിന്റേയും മേൽക്കൂര കത്തിയമർന്നിരുന്നു. എന്നാൽ ആർക്കും പൊള്ളലേറ്റില്ലെന്നത് അത്ഭുതമാണെന്നും ക്യാപ്റ്റൻ പറഞ്ഞു. ഒരു ചെറിയ ബൈബിൾ തീ ഇടുന്നതിനിടയിൽ എങ്ങനെയാണു വീടുകളിലേക്ക് ആളിപ്പടർന്നത് എന്നതിനെകുറിച്ച് വിശദീകരണം നൽകാനാവാതെ വിഷമിക്കുകയാണു ഫയർഫോഴ്സ്.ഏതായാലും ബൈബിളിനു തീയിട്ട സ്ത്രീയെ പൊലീസ് കസ്റ്റഡിയിലെടുത്തു. ഇവർക്കെതിരെ എന്തുകുറ്റമാണ് ചാർജ് ചെയ്യേണ്ടതെന്നു തീരുമാനിച്ചിട്ടില്ലെന്നും പൊലീസ് അറിയിച്ചു.