അന്തരിച്ച മുന്ധനമന്ത്രിയും കേരള കോണ്ഗ്രസ് എം നേതാവുമായ കെ എം മാണിയുടെ ആത്മകഥ പ്രകാശനം ചെയ്തു.മാണിക്ക് സ്വന്തം മുന്നണിയില് നിന്ന് തന്നെ തിക്താനുഭവം ഉണ്ടായി മുഖ്യമന്ത്രി
1975ല് രാജ്യത്താകെ ഏര്പ്പെടുത്തിയ അടിയന്താരവസ്ഥയ്ക്ക് ശേഷം കേരളത്തിലെ മുന്നണിയില് ഉണ്ടായ പ്രശ്നങ്ങളും മാറ്റങ്ങളും കെ എം മാണി ആത്മകഥയില് പറഞ്ഞിട്ടുണ്ടെന്നും മുഖ്യമന്ത്രി കൂട്ടിച്ചേര്ത്തു.
![The autobiography of late former finance minister and Kerala Congress M leader KM Mani has been released. Mani had a lot of experience from his own front.](https://indiavisionmedia.com/wp-content/uploads/2024/01/km-mani-atobio.jpg)
തിരുവനന്തപുരം | അന്തരിച്ച മുന്ധനമന്ത്രിയും കേരള കോണ്ഗ്രസ് എം നേതാവുമായ കെ എം മാണിയുടെ ആത്മകഥ പ്രകാശനം ചെയ്തു. മുഖ്യമന്ത്രി പിണറായി വിജയനാണ് പുസ്തകം പ്രകാശനം ചെയ്തത്. മാണിക്ക് സ്വന്തം മുന്നണിയില് നിന്ന് തന്നെ തിക്താനുഭവം ഉണ്ടായെന്നും എതിര് മുന്നണിക്കാര് പോലും ചെയ്യാത്തതാണ് സ്വന്തം മുന്നണിയില് നിന്നുണ്ടായെന്നും മുഖ്യമന്ത്രി പറഞ്ഞു. 1975ല് രാജ്യത്താകെ ഏര്പ്പെടുത്തിയ അടിയന്താരവസ്ഥയ്ക്ക് ശേഷം കേരളത്തിലെ മുന്നണിയില് ഉണ്ടായ പ്രശ്നങ്ങളും മാറ്റങ്ങളും കെ എം മാണി ആത്മകഥയില് പറഞ്ഞിട്ടുണ്ടെന്നും മുഖ്യമന്ത്രി കൂട്ടിച്ചേര്ത്തു. ആരെയും വേദനിപ്പിക്കാതിരിക്കാന് ആത്മകഥയെഴുതുമ്പോള് കെ എം മാണി ശ്രദ്ധിച്ചിരുന്നുവെന്നായിരുന്നു ജോസ് കെ മാണിയുടെ പ്രതികരണം. നിയമസഭാ മന്ദിരത്തിലുള്ള ആര്.ശങ്കരനാരായണന് തമ്പി ഹാളില് വച്ചാണ് 500ഓളം പേജുകളുള്ള ‘ആത്മകഥ’ പ്രകാശനം നടന്നത്.
ബാര്ക്കോഴ കേസില് കോണ്ഗ്രസ് നേതാക്കളെ പ്രതിക്കൂട്ടില് നിര്ത്തി യാണ് കെഎം മാണിയുടെ ആത്മകഥ. മുഖ്യമന്ത്രിയാകാന് സഹായിച്ചില്ലെന്ന കാരണത്താല് രമേശ് ചെന്നിത്തല തനിക്കെതിരെ തിരിഞ്ഞെന്ന് ആത്മകഥയില് പറയുന്നു. ചില നേതാക്കളുടെ കുതന്ത്രങ്ങളുടെ ആകെത്തുകയായിരുന്നു ബാര്ക്കോഴ കേസെന്നും പുസ്തകത്തിലുണ്ട്. .
കേരളാ കോണ്ഗ്രസ് പാര്ട്ടിയെയും തന്നെയും ഇല്ലാതാക്കാന് എല്ലാകാലവും ശ്രമിച്ചത് കോണ്ഗ്രസ് നേതാക്കളാണെന്ന കുറ്റപ്പെടുത്തലാണ് ആത്മകഥയിലെ രാഷ്ട്രീയ അധ്യായങ്ങളിലുള്ളത്. ബാര്ക്കോഴ ആരോപണത്തില് പേരെടുത്ത് പരാമര്ശിക്കുന്നത് അന്നത്തെ ആഭ്യന്തരമന്ത്രി രമേശ് ചെന്നിത്തലയെയാണ്. രമേശിനെ മുഖ്യമന്ത്രിയാക്കണമെന്നാവശ്യപ്പെട്ട് ഒരു കോണ്ഗ്രസ് നേതാവ് സമീപിച്ചു. അതിന് താന് വിലകല്പ്പിച്ചില്ല. ഇതോടെ ബാര്ക്കോഴ ആരോപണം ഒരു വടിയായി തനിക്കെതിരെ ഉപയോഗിച്ചു. ആരോപണം ഉണ്ടാവാന് കാത്തിരുന്നത് പോലെയാണ് ചെന്നിത്തല പ്രവര്ത്തിച്ചത്. അടിയന്തരകാര്യം എന്നതുപോലെ തനിക്കെതിരെ വിജിലന്സിന്റെ ത്വരിതാന്വേഷണം പ്രഖ്യാപിച്ചു. ഇത്തിരി വെള്ളം കുടിക്കട്ടെ എന്ന് ചെന്നിത്തല മനസില് കരുതിയിരിക്കും. തനിക്കെതിരെ ആരോപണം ഉന്നയിച്ച വ്യക്തിക്ക് ചില മുതിര്ന്ന കോണ്ഗ്രസ് നേതാക്കളുമായി ബന്ധമുണ്ടായിരുന്നു. അദ്ദേഹത്തിന്റെ മകളുടെ കല്യാണത്തിന് രമേശ് ചെന്നിത്തലയും ഉമ്മന്ചാണ്ടിയും വിവാഹനടത്തിപ്പുകാരായി മാറിയെന്നും മാണി ആത്മകഥയിൽ പറയുന്നു.
തന്റെ രാഷ്ട്രീയ ജീവിതത്തിലെ ഏറ്റവും വേദനാജനകമായ നാളുകള്ക്ക് കാരണക്കാര് കോണ്ഗ്രസ് നേതാക്കളാണെന്ന് കുറിച്ചു വച്ചിരിക്കുകയാണ് മാണി ആത്മകഥയില്. ആരോപണങ്ങളെ അതിജീവിച്ച് താന് പാലായില് ജയിച്ചെങ്കിലും യുഡിഎഫിന് ഭൂരിപക്ഷം നഷ്ടപ്പെടാനുള്ള പ്രധാനകാരണം കോണ്ഗ്രസിലെ ഗ്രൂപ്പുകളിയായിരുന്നു എന്നും ആത്മകഥ പറയുന്നു. കെഎം മാണി മരിക്കുന്നതിന് ആറു മാസം മുമ്പ് എഴുതിയ ആത്മകഥയാണ് ഇപ്പോൾ പ്രസിദ്ധീകരിക്കുന്നതെന്നാണ് കെഎം മാണി ഫൗണ്ടേഷന്റെ വിശദീകരണം.