ഇടുക്കിയിൽ വീടിന് സമീപം തല വേർപെട്ട നിലയിൽ വീട്ടമ്മയുടെ മൃതദേഹം

മൂന്നാർ | ഇടുക്കി ശാന്തൻപാറയിൽ വീട്ടമ്മയെ ശിരസ് അറ്റ് മരിച്ചനിലയിൽ കണ്ടെത്തി. ശാന്തൻപാറ ചേരിയാർ സ്വദേശിനി റാണി(55) ആണ് മരിച്ചത്. കൊലപാതകമാണെന്നാണ് സംശയം. ആദ്യം ഏതെങ്കിലും വന്യജീവി ആക്രമണത്തിൽ കൊല്ലപ്പെട്ടതാവാമെന്ന നിഗമനമുണ്ടായിരുന്നെങ്കിലും പോലീസ് നടത്തിയ വിദഗ്ധ പരിശോധനയിലാണ് കൊലപാതകമെന്ന തരത്തിലുള്ള സൂചനകൾ ലഭിച്ചത്.
ചൊവ്വാഴ്ച രാവിലെയാണ് റാണിയുടെ മൃതദേഹം കണ്ടെത്തിയത്. തലവേർപെട്ട നിലയിലുള്ള മൃതദേഹം അവർ താമസിച്ചിരുന്ന വീടിന് ഏകദേശം 40 മീറ്റർ അകലെ നിന്നാണ് കണ്ടെത്തിയത്. സംഭവത്തിന് പിന്നാലെ വീടിനുള്ളിൽ പരിശോധന നടത്തിയ പോലീസ് ഉദ്യോഗസ്ഥർക്ക് നിർണായകമായ വിവരങ്ങളാണ് ലഭിച്ചത്. റാണിയും അക്രമിയും തമ്മിൽ വീടിനകത്തുവെച്ച് കടുത്ത മൽപ്പിടുത്തം നടന്നതിന്റെ ലക്ഷണങ്ങളും ചുമരിലും തറയിലും രക്തപ്പാടുകൾ തെറിച്ചതിന്റെ തെളിവുകളും കണ്ടെത്തി.
വീട്ടിൽവെച്ച് കൊലപാതകം നടത്തിയതിന് ശേഷം റാണിയുടെ മൃതദേഹം പുറത്തേക്ക് വലിച്ചിഴച്ച് കൊണ്ടുപോയി ഉപേക്ഷിക്കുകയായിരുന്നു എന്നാണ് സംശയം. ഭർത്താവ് മരിച്ച റാണിയുടെ രണ്ടുമക്കളും ജോലി ആവശ്യങ്ങൾക്കായി പുറത്തുപോയിരുന്ന സമയത്താണ് കൃത്യം നടന്നത്. തോട്ടങ്ങളിലേക്ക് ആവശ്യമായ ഇതര സംസ്ഥാന തൊഴിലാളികളെ എത്തിച്ചുകൊടുക്കുന്ന ജോലിയാണ് റാണിയുടേത്. വീടിന് സമീപത്തായി ഇതര സംസ്ഥാന തൊഴിലാളികൾ താമസിച്ചിരുന്നു. എങ്കിലും, ഈ കൊലപാതകത്തിന് പിന്നിൽ ഇതര സംസ്ഥാനക്കാരാണെന്ന് സംശയിക്കാൻ തക്ക തെളിവുകളൊന്നും ഇതുവരെ ലഭിച്ചിട്ടില്ലെന്ന് പോലീസ് വ്യക്തമാക്കി.
പോസ്റ്റ്‌മോർട്ടം റിപ്പോർട്ടും ശാസ്ത്രീയ പരിശോധനാ ഫലങ്ങളും ലഭ്യമായ ശേഷമേ മരണത്തിന്റെ കൃത്യമായ സ്വഭാവം വ്യക്തമാകൂ എന്ന് ഉദ്യോഗസ്ഥർ അറിയിച്ചു. സംഭവസ്ഥലത്തുനിന്ന് കേസിന് സഹായകരമായ ചില തെളിവുകൾ പോലീസിന് ലഭിച്ചിട്ടുണ്ടെന്നും അന്വേഷണം ഊർജിതമാക്കിയിട്ടുണ്ടെന്നും പോലീസ് അറിയിച്ചു.