വന്യമൃഗ ആക്രമണം , ഹൈക്കോടതി സ്വമേധയാ എടുത്ത ഹര്‍ജി ഇന്ന് പരിഗണിക്കും
കാടിനുള്ളിൽ മൃഗങ്ങൾക്ക് കൃത്യമായി വെള്ളവും ഭക്ഷണവും ഉറപ്പാക്കാന്‍ സ്വീകരിച്ച നടപടികള്‍ സര്‍ക്കാര്‍ ഇന്ന് കോടതിക്ക് മുമ്പാകേ വിശദീകരിക്കും
കൊച്ചി | സംസ്ഥാനത്ത് വന്യമൃഗ ശല്യം രൂക്ഷമായ സാഹചര്യത്തിൽ ഹൈക്കോടതി സ്വമേധയാ സ്വീകരിച്ച ഹര്‍ജി ഇന്ന് പരിഗണിക്കും. ജസ്റ്റിസുമാരായ ഡോ എ കെ ജയശങ്കരന്‍ നമ്പ്യാര്‍, പി ഗോപിനാഥ് എന്നിവര്‍ ഉള്‍പ്പെട്ട പ്രത്യേക ബെഞ്ചാണ് ഹർജി പരിഗണിക്കുക. ഇന്ന് വൈകിട്ട് 3 മണിക്കാണ് കോടതി ഹർജി പരിഗണിക്കുക.
കാടിനുള്ളിൽ മൃഗങ്ങൾക്ക് കൃത്യമായി വെള്ളവും ഭക്ഷണവും ഉറപ്പാക്കാന്‍ സ്വീകരിച്ച നടപടികള്‍ സര്‍ക്കാര്‍ ഇന്ന് കോടതിക്ക് മുമ്പാകേ വിശദീകരിക്കും. ഹൈക്കോടതി നിര്‍ദ്ദേശം അനുസരിച്ച് രൂപീകരിച്ച സംയുക്ത കര്‍മ്മ പദ്ധതിയെക്കുറിച്ച് സര്‍ക്കാര്‍ ഇന്ന് ഹൈക്കോടതിയെ അറിയിക്കും. ഈ വിഷയവുമായി ബന്ധപ്പെട്ട് സര്‍ക്കാര്‍ ഇതുവരെ സ്വീകരിച്ച നടപടികളുടെ പുരോഗതിയും ഹൈക്കോടതി വിലയിരുത്തും.വയനാട്ടിലെ വന്യമൃഗ ആക്രമണങ്ങളുടെ പശ്ചാത്തലത്തിലാണ് സ്വമേധയാ സ്വീകരിച്ച ഹര്‍ജി ഹൈക്കോടതി പരിഗണിക്കുന്നത്.