ചെന്നൈയിൽ 1,200 കോടി രൂപ ചെലവിൽ പുതിയ സംയോജിത നിയമസഭാ-സെക്രട്ടറിയേറ്റ് സമുച്ചയം സി ജോസഫ് വിജയ്

ചെന്നൈ | ചെന്നൈയിൽ 1,200 കോടി രൂപ ചെലവിൽ പുതിയ സംയോജിത നിയമസഭാ-സെക്രട്ടറിയേറ്റ് സമുച്ചയം നിർമിക്കാൻ തമിഴ്‌നാട് മുഖ്യമന്ത്രി സി ജോസഫ് വിജയ് പദ്ധതി പ്രഖ്യാപിച്ചു. 20 ലക്ഷം ചതുരശ്ര അടിയിലാണ് വിഭാവനം ചെയ്തിരിക്കുന്നത്. ഇതിനായി ചെന്നൈ പട്ടണപ്പാക്കത്തെ ഫോർഷോർ എസ്റ്റേറ്റിൽ തമിഴ്‌നാട് ഹൗസിങ് ബോർഡിന്റെയും കോർപറേഷന്റെയും ഉടമസ്ഥതയിലുള്ള 25 ഏക്കർ ഭൂമി കണ്ടെത്തി.
15 നിലകളോടെ നിർമിക്കുന്ന കെട്ടിടത്തിൽ ആധുനിക നിയമസഭാ സൗകര്യങ്ങൾ, കോൺഫറൻസ് ഹാളുകൾ, പാർക്കിംഗ് എന്നിവയുണ്ടാകും. നിലവിലെ ഫോർട്ട് സെന്റ് ജോർജിലെ സ്ഥലപരിമിതിയും പ്രതിരോധ മന്ത്രാലയത്തിന്റെ നിയന്ത്രണങ്ങളുമാണ് പുതിയ തീരുമാനത്തിന് കാരണം. ഈ സ്ഥലം വിജയുടെ വസതിയിൽ നിന്ന് തൊട്ടടുത്തായതിനാൽ ഇത് അദ്ദേഹത്തിന് വ്യക്തിപരമായ സൗകര്യമൊരുക്കാനാണെന്ന രാഷ്ട്രീയ ആരോപണങ്ങൾ ഉയർന്നിട്ടുണ്ട്. എന്നാൽ ഗതാഗതക്കുരുക്ക് കുറയ്ക്കാനും ഭരണസൗകര്യത്തിനുമാണ് സ്ഥലമാറ്റമെന്നാണ് ഔദ്യോഗിക വിശദീകരണം.
1980-ൽ എംജിആറിന്റെ കാലം തൊട്ടും, 2002-ൽ ജയലളിതയുടെ കാലത്തും, 2010-ൽ കരുണാനിധിയുടെ കാലത്തും (ഓമന്ദൂരാർ സമുച്ചയം) ഭരണകേന്ദ്രം മാറ്റാൻ ശ്രമങ്ങൾ നടന്നിരുന്നു. കരുണാനിധിയുടെ ഡിഎംകെ (DMK) ഭരണകാലത്ത് ഓമന്ദൂരാർ ഗവൺമെന്റ് എസ്റ്റേറ്റിൽ പുതിയ സമുച്ചയം നിർമിച്ച് 2010 മാർച്ച് 13-ന് അന്നത്തെ പ്രധാനമന്ത്രി മൻമോഹൻ സിംഗ് ഉദ്ഘാടനം ചെയ്തു. എന്നാൽ 2011-ൽ ജയലളിത അധികാരത്തിൽ തിരിച്ചെത്തിയതോടെ പ്രവർത്തനം വീണ്ടും ഫോർട്ട് സെന്റ് ജോർജിലേക്ക് മാറ്റി. തുടർന്ന് ഓമന്ദൂരാർ സമുച്ചയം സൂപ്പർ സ്പെഷ്യാലിറ്റി ആശുപത്രിയാക്കി മാറ്റി.
അതേസമയം, മുഖ്യമന്ത്രിയുടെ ഓഫീസ് ഫോർട്ട് സെന്റ് ജോർജിലെ ഒന്നാം നിലയിൽ നിന്ന് നാമക്കൽ കവിഞ്ജർ മാളികയുടെ പത്താം നിലയിലേക്ക് മാറ്റിസ്ഥാപിച്ചതും, പുതിയ സമുച്ചയം ബംഗാൾ ഉൾക്കടലിന് അഭിമുഖമായി (കിഴക്കോട്ട്) പ്ലാൻ ചെയ്തതും ജ്യോതിഷപരമായ കാരണങ്ങളാലാണെന്ന വാദങ്ങളും ശക്തമാണ്.എന്നാൽ തിരക്കേറിയ പട്ടണപ്പാക്കത്തിന് പകരം നഗരത്തിന് പുറത്ത് ഭരണകേന്ദ്രം നിർമിക്കണമെന്ന് പിഎംകെ നേതാവ് അൻപുമണി രാമദോസ് ആവശ്യപ്പെട്ടു. അടിസ്ഥാന സൗകര്യ വികസനത്തിനൊപ്പം തമിഴ്‌നാട് രാഷ്ട്രീയത്തിൽ വലിയ ചർച്ചകൾക്കാണ് ഈ പദ്ധതി വഴിതുറന്നിരിക്കുന്നത്.