ബംഗ്ലാദേശിന്‍റെ ക്രിക്കറ്റ് ചരിത്രത്തിലെ ആദ്യ ലോകകപ്പ് വിജയം
ദക്ഷിണാഫ്രിക്ക : ബംഗ്ലാദേശിന്‍റെ പുതുതലമുറ അണ്ടര്‍ 19 ലോക കപ്പ് ക്രിക്കറ്റില്‍ ആദ്യമുത്തമിട്ടു. മഴക്കു പോലും തടസ്സപ്പെടുത്താന്‍ കഴിയാതിരുന്ന വിജയം മൂന്നു വിക്കറ്റിന് സ്വന്തമാക്കിയാണ് ബംഗ്ലാദേശിന്‍റെ യുവനിര സ്വന്തമാക്കിയത്. ക്ലൈമാക്സില്‍ പെയ്ത മഴകാരണം ഡക്വര്‍ത്ത് ലൂയിസ് നിയമപ്രകാരം പുതുക്കി നിശ്ചയിച്ച 170 റണ്‍സിന്‍റെ മാര്‍ജിന്‍ ഏഴ് വിക്കറ്റ് നഷ്ടത്തില്‍ ബംഗ്ലാദേശ് സ്വന്തമാക്കി.
കിരീടം നിലനിര്‍ത്താനിറങ്ങിയ ഇന്ത്യന്‍ യുവനിരയെ എറിഞ്ഞൊതുക്കിയ ബംഗ്ലാദേശിന് അതേ നാണയത്തില്‍ ഇന്ത്യ മറുപടി നല്‍കിയെങ്കിലും അര്‍ഹിച്ച വിജയം ബംഗ്ലാ യുവാക്കള്‍ അടിച്ചെടുക്കുകയായിരുന്നു. ഇന്ത്യന്‍ സ്പിന്നിനു മുന്നില്‍ വട്ടം കറങ്ങിയ ബംഗ്ലാദേശുകാര്‍ ഒരു ഘട്ടത്തില്‍ പരാജയത്തെ മുന്നില്‍ കണ്ടതാണ്.പക്ഷേ, നേരത്തെ പരിക്കേറ്റ് കരയ്ക്ക് കയറിയ ഓപ്പണര്‍ പര്‍വേസ് ഹുസൈന്‍ ഇമോണ്‍ തിരിച്ചുവന്ന് നടത്തിയ ഉജ്ജ്വല പോരാട്ടവും 32 റണ്ണുമായി അവസാനം വരെ ഉച്ചുനിന്ന ക്യാപ്റ്റന്‍ അക്ബര്‍ അലിയുമാണ് കളിയിലേക്ക് ബംഗ്ലാ ടീമിനെ തിരിച്ചുകൊണ്ടുവന്നത്.