ഇറ്റാലിയന്‍ ലീഗ് കിരീടം തുടര്‍ച്ചയായ ഏഴാം പ്രാവശ്യവും യുവന്‍റസ് സ്വന്തമാക്കി.
മിലൻ: ഇറ്റാലിയന്‍ ലീഗ് കിരീടം തുടര്‍ച്ചയായ ഏഴാം പ്രാവശ്യവും യുവന്‍റസ് സ്വന്തമാക്കി. എഎസ് റോമയ്ക്കെതിരെ ഗോൾരഹിത സമനില പിടിച്ച യുവന്‍റസ് നിർണായകമായ ഒരു പോയിന്‍റ് നേടി. ഇതോടെ ഒരു മത്സരം ബാക്കി നിൽക്കെ യുവന്‍റസ് കിരീടം ഉറപ്പിക്കുകയായിരുന്നു.
ലീഗിൽ 37 മത്സരങ്ങളിൽ 92 പോയിന്‍റാണ് യുവന്‍റസിനുള്ളത്. അതേസമയം, നാപോളിക്ക് 37 മത്സരങ്ങളില്‍ 88 പോയന്‍റാണുള്ളത്. അവസാന മത്സരം വിജയിച്ച് മൂന്നു പോയിന്‍റ് നേടിയാലും നാപോളിക്ക് ഒന്നാമത്തെത്താൻ സാധിക്കില്ല.
യുവന്‍റസിന്‍റെ 34-ാം ലീഗ് കിരീടമാണിത്. നേരത്തെ, എസി മിലാനെ തോൽപ്പിച്ച് കോപ്പ ഇറ്റാലിയ കിരീടവും യുവന്‍റസ് നേടിയിരുന്നു.