തൃപ്തി ദേശായിയും സംഘവും ശബരിമലയിലേക്ക്
ഭൂമാതാ ബ്രിഗേഡ് പ്രവര്‍ത്തകര്‍ക്കൊപ്പം ബിന്ദു അമ്മിണിയും ഉണ്ട്. സംഘം ശബരിമലയിലേക്ക് തിരിച്ചു.
കൊച്ചി :ശബരിമല ദര്‍ശനത്തിനായി തൃപ്തി ദേശായിയും സംഘവും കേരളത്തിലെത്തി. പുലര്‍ച്ചെയാണ് സംഘം നെടുമ്പാശ്ശേരിയില്‍ എത്തിയത്. ഭൂമാതാ ബ്രിഗേഡ് പ്രവര്‍ത്തകര്‍ക്കൊപ്പം ബിന്ദു അമ്മിണിയും ഉണ്ട്. സംഘം ശബരിമലയിലേക്ക് തിരിച്ചു.ദര്‍ശനം നടത്താതെ മടങ്ങില്ലെന്ന് തൃപ്തി ദേശായി പറഞ്ഞു.ശബരിമലയിലേക്ക് പോകുന്നതിന് വിലക്ക് സർക്കാർ എഴുതി നൽകിയാൽ മടങ്ങാമെന്നും തൃപ്തി ദേശായി. കോട്ടയം വഴിയാണ് തൃപ്തി ദേശായിയും സംഘവും ശബരിമലയിലേക്ക് പോകുന്നതെന്നാണ് റിപ്പോർട്ടുകൾ. പ്രധാനമന്ത്രിക്കും മുഖ്യമന്ത്രിക്കും കത്തയച്ചിരുന്നു, ഇപ്പോഴുള്ളത് എറണാകുളം സ്പെഷ്യല്‍ ബ്രാഞ്ച് ഓഫീസിലെന്നും തൃപ്തി പറഞ്ഞു.
ശബരിമലയില്‍ യുവതീപ്രവേശം അനുവദിച്ചുള്ള സുപ്രീംകോടതി വിധിക്ക് പിന്നാലെ കഴിഞ്ഞ മണ്ഡലകാലത്തും തൃപ്തി ദേശായി കേരളത്തിലെത്തിയിരുന്നു.എന്നാല്‍ ശബരിമല കര്‍മസമിതി അടക്കമുള്ള സംഘടനകളുടെ വന്‍ പ്രതിഷേധത്തെ തുടര്‍ന്ന് അവര്‍ മടങ്ങിപ്പോവുകയായിരുന്നു. കൊച്ചി നെടുമ്പാശ്ശേരി വിമാനത്താവളത്തില്‍ നിന്ന് പുറത്തിറങ്ങാന്‍ പോലും കഴിയാതെയായിരുന്നു തൃപ്തി ദേശായി അന്ന് മടങ്ങിപ്പോയത്.