സംസ്ഥാനത്ത് കൂടുതൽ ലോക്ക്ഡൗൺ ഇളവുകൾ ഏർപ്പെടുത്തി ഉത്തരവിറങ്ങി,ബാങ്കുകളും ധനകാര്യ സ്ഥാപനങ്ങളും തിങ്കൾ, ബുധൻ, വെള്ളി ദിവസങ്ങളിൽ വൈകുന്നേരം അഞ്ച് മണിവരെ തുറക്കാം

തിരുവനന്തപുരം :സംസ്ഥാനത്ത് കൂടുതൽ ലോക്ക്ഡൗൺ ഇളവുകൾ ഏർപ്പെടുത്തി. ബാങ്കുകളും ധനകാര്യ സ്ഥാപനങ്ങളും തിങ്കൾ, ബുധൻ, വെള്ളി ദിവസങ്ങളിൽ വൈകുന്നേരം അഞ്ച് മണിവരെ തുറക്കാം. ജൂൺ 1, 3, 5, 8 തീയതികൾ ബാങ്കുകൾക്കും ധനകാര്യ സ്ഥാപനങ്ങൾക്കും അവധി അയിരിക്കും. കള്ളുഷാപ്പുകളിൽ പാഴ്സൽ നൽകാം.
തുണിക്കടകൾ, ചെരുപ്പുകടകൾ, പഠനസാമഗ്രികൾ വിൽക്കുന്ന കടകൾ എന്നിവകൾക്ക് ആഴ്ചയിൽ മൂന്ന് ദിവസം തുറക്കാം. തിങ്കൾ, ബുധൻ, വെള്ളി ദിവസങ്ങളിൽ തുണി, ചെരുപ്പുകടകൾക്ക് തുറന്നുപ്രവർത്തിക്കാം. ചൊവ്വ, വ്യാഴം, ശനി ദിവസങ്ങളിലാണ് പഠനസാമഗ്രികൾ വിൽക്കുന്ന കടകൾ തുറക്കാൻ അനുമതിയുള്ളത്. രാവിലെ 9 മുതൽ വൈകുൻണേരം അഞ്ച് വരെയാണ് പ്രവർത്തനസമയം.വ്യവസായ മേഖലകളിൽ മിനിമം ബസുകൾ വച്ച് കെഎസ്ആർടിസിയ്ക്ക് സർവീസ് നടത്താം

ലോക് ഡൗണ്‍ നിയന്ത്രണങ്ങളിലെ ഇളവുകള്‍

• റാങ്ക് ലിസ്റ്റില്‍ ഉള്‍പ്പെട്ടിട്ടുള്ള ഉദ്യോഗാര്‍ത്ഥികള്‍ക്ക് നിയമന അഡൈ്വസ് അയയ്ക്കുന്നതിനായി ആവശ്യമായ മിനിമം ജീവനക്കാരെ വെച്ച് കേരള പബ്ലിക് സര്‍വീസ് കമ്മീഷന് പ്രവര്‍ത്തിക്കാം.
• പത്താം ക്ലാസ്സിലും പന്ത്രണ്ടാം ക്ലാസിലും പരീക്ഷാപേപ്പര്‍ വാല്യുവേഷന്‍ ജോലികളില്‍ ഏര്‍പ്പെട്ടിരിക്കുന്ന അധ്യാപകര്‍ക്കും അതിനു വേണ്ട ക്രമീകരണങ്ങള്‍ നടത്തേണ്ട മറ്റു ജീവനക്കാര്‍ക്കും പ്രവര്‍ത്തനാനുമതി നല്‍കുന്നു. ഇത്തരം ജീവനക്കാരുടെ തിരിച്ചറിയല്‍ രേഖ ഉപയോഗിച്ച് ഇവര്‍ക്ക് വീട്ടില്‍നിന്ന് ഓഫീസിലേക്കും തിരിച്ചും യാത്ര ചെയ്യാം.
• കേരള എന്‍വിറോ ഇന്‍ഫ്രാസ്ട്രക്ചര്‍ ലിമിറ്റഡിന് മിനിമം ജീവനക്കാരെ ഉപയോഗിച്ച് ഹസാര്‍ഡ് വേസ്റ്റ് മാനേജ്‌മെന്റ് പ്രവര്‍ത്തനങ്ങള്‍ക്ക് അനുമതി ഉണ്ടായിരിക്കും.
• വെട്ടുകല്ല്/ചെത്ത് കല്ല് എന്നിവ ചെത്തി എടുക്കുവാനും വാഹനങ്ങളില്‍ അവ നിര്‍മ്മാണ സ്ഥലത്തേക്ക് കൊണ്ടുപോകുന്നതിനുള്ള അനുമതി ഉണ്ടായിരിക്കും.
• റബര്‍ മരങ്ങള്‍ക്ക് റെയിന്‍ ഗാര്‍ഡ് ഇടുവാനുള്ള അനുമതിയും ആവശ്യമായ സാധനസാമഗ്രികള്‍ വില്‍ക്കുന്ന കടകള്‍ക്ക് തുറന്നു പ്രവര്‍ത്തിക്കാനുള്ള അനുമതി ഉണ്ടായിരിക്കും.
• മലഞ്ചരക്ക് വ്യാപാരം നടത്തുന്ന കടകള്‍ക്ക് ജില്ലയില്‍ ചൊവ്വ, വ്യാഴം ദിവസങ്ങളില്‍ തുറന്നു പ്രവര്‍ത്തിക്കാം.
• ഓട്ടോമൊബൈല്‍, സ്‌പെയര്‍ പാര്‍ട്‌സ് വില്‍ക്കുന്ന കടകള്‍ക്ക് തിങ്കള്‍, വ്യാഴം ദിവസങ്ങളില്‍ പ്രവര്‍ത്തിക്കാം.
• സ്ത്രീകളുടെ ശുചിത്വ (Women Hygiene) സാധനങ്ങള്‍ വില്‍പ്പന സ്ഥലങ്ങളില്‍ എത്തിക്കുന്നതിനുളള വാഹനങ്ങള്‍ക്ക് അനുമതി നല്‍കുന്നു.
• കണ്ണടകള്‍ വില്‍പനയും, അറ്റകുറ്റപ്പണികളും നടത്തുന്ന കടകള്‍ക്ക് ചൊവ്വ, ശനി ദിവസങ്ങളില്‍ തുറന്നു പ്രവര്‍ത്തിക്കാം.
• ശ്രവണ സഹായ ഉപകരണങ്ങള്‍ വില്‍ക്കുകയും അറ്റകുറ്റപ്പണികള്‍ നടത്തുകയും ചെയ്യുന്ന കടകള്‍ക്ക് ചൊവ്വ, ശനി ദിവസങ്ങളില്‍ തുറന്നു പ്രവര്‍ത്തിക്കാം.
• കൃത്രിമ കാലുകള്‍ വില്പനയും അറ്റകുറ്റപ്പണികള്‍ നടത്തുകയും ചെയ്യുന്ന കടകള്‍ക്ക് ചൊവ്വ, ശനി ദിവസങ്ങളില്‍ തുറന്നു പ്രവര്‍ത്തിക്കാം.
• ഗ്യാസ് സ്റ്റൗ അറ്റകുറ്റപ്പണികള്‍ നടത്തുന്ന കടകള്‍ക്ക് ചൊവ്വ, ശനി ദിവസങ്ങളില്‍ തുറന്നു പ്രവര്‍ത്തിക്കാം.
• മൊബൈല്‍ ഫോണുകളും കമ്പ്യൂട്ടറുകളും അറ്റകുറ്റപ്പണികള്‍ നടത്തുന്ന കടകള്‍ക്കും മൊബൈല്‍ റീചാര്‍ജ് കടകള്‍ക്കും ചൊവ്വ, ശനി ദിവസങ്ങളില്‍ തുറന്നു പ്രവര്‍ത്തിക്കാം്.

അനുമതി നല്‍കിയിട്ടുള്ള കടകള്‍/വ്യാപാര സ്ഥാപനങ്ങള്‍ എന്നിവയ്ക്ക് ഇടുക്കി ജില്ലയില്‍ നിശ്ചിത ദിവസങ്ങളില്‍ രാവിലെ 9 മണി മുതല്‍ വൈകുന്നേരം 5 മണി വരെ മാത്രം തുറന്നു പ്രവര്‍ത്തിക്കാം.