നിമിഷപ്രിയയുടെ മോചനത്തില് കേന്ദ്രസര്ക്കാര് അടിയന്തിരമായി ഇടപെടണമെന്ന് രമേശ് ചെന്നിത്തല
വധശിക്ഷ ഒഴിവാക്കാനുള്ള നടപടികള് സ്വീകരിക്കണമെന്നും അദ്ദേഹം ആവശ്യപ്പെട്ടു
തിരുവനന്തപുരം: യെമനില് വധശിക്ഷയ്ക്ക് വിധിക്കപ്പെട്ട നിമിഷപ്രിയയുടെ മോചനത്തില് കേന്ദ്രസര്ക്കാര് അടിയന്തിരമായി ഇടപെടണമെന്ന് കോണ്ഗ്രസ് നേതാവ് രമേശ് ചെന്നിത്തല. വധശിക്ഷ ഒഴിവാക്കാനുള്ള നടപടികള് സ്വീകരിക്കണമെന്നും അദ്ദേഹം ആവശ്യപ്പെട്ടു. പിഎം കുസും പദ്ധതിയിലും അദ്ദേഹം പ്രതികരിച്ചു. പിഎം കുസും പദ്ധതിയില് അനര്ട്ട് സിഇഒ അടക്കം ഉള്ളവര്ക്ക് പങ്കുണ്ടെന്നും അഴിമതിയുടെ കൂടുതല് വിശദാംശങ്ങള് പുറത്ത് വരാനുണ്ടെന്നും അദ്ദേഹം പറഞ്ഞു. അതേ സമയം തരൂര് സര്വേ പങ്കുവച്ചതുമായി ബന്ധപ്പെട്ട ചോദ്യങ്ങളോട് ചെന്നിത്തല പ്രതികരിച്ചില്ല.
യെമന് പൗരന് തലാല് അബ്ദു മഹ്ദി കൊല്ലപ്പെട്ട കേസില് യെമനിലെ ജയിലില് കഴിയുന്ന മലയാളി നിമിഷപ്രിയയുടെ വധശിക്ഷ ജൂലൈ 16ന് നടപ്പിലാക്കുമെന്ന് റിപ്പോര്ട്ടുകളുണ്ടായിരുന്നു. ഇത് സംബന്ധിച്ച ഉത്തരവില് യെമനിലെ പബ്ലിക്ക് പ്രോസിക്യൂട്ടര് ഒപ്പുവെച്ചതായാണ് റിപ്പോര്ട്ട്. നിമിഷപ്രിയയുടെ മോചനത്തിന് തലാല് അബ്ദു മഹ്ദിയുടെ കുടുംബം ദയാധനം ആവശ്യപ്പെട്ടെന്ന വിവരവും പുറത്ത് വന്നിരുന്നു. മഹ്ദിയുടെ കുടുംബം ദയാധനമായി ഒരു മില്യണ് ഡോളര് (8.67 കോടി രൂപ) ആണ് ആവശ്യപ്പെട്ടിരിക്കുന്നത്. 2017ലാണ് യെമന് പൗരനായ തലാല് അബ്ദുമഹ്ദി കൊല്ലപ്പെട്ടത്. ശേഷം അബ്ദുമഹ്ദിയുടെ കുടുംബത്തെ നേരില്കണ്ട് മോചനം സാധ്യമാക്കാന് നിമിഷപ്രിയയുടെ കുടുംബം ശ്രമിച്ചിരുന്നെങ്കിലും ഫലം കണ്ടിരുന്നില്ല. അബ്ദുമഹ്ദി ഉള്പ്പെടുന്ന ഗോത്രത്തിന്റെ തലവന്മാരുമായും ചര്ച്ചകള് നടത്തിയിരുന്നെങ്കിലും അതും ഫലവത്തായിരുന്നില്ല.