ബൈഡനെതിരായ ലൈംഗീകാരോപണം പ്രസക്തം : ബെര്‍ണി സാന്റേഴ്‌സ്
ബൈഡന്റെ സ്ഥാനാര്‍ഥിത്വത്തെ ചുറ്റിപ്പറ്റി ആഴ്ചകളായി കേള്‍ക്കുന്ന ഈ ആരോപണം ഉന്നയിച്ച സ്ത്രീയുടെ വാദവും നാം കേള്‍ക്കണമെന്നും ബെര്‍ണി അഭിപ്രായപ്പെട്ടു.
വെര്‍മോണ്ട് : ഡമോക്രാറ്റിക് സ്ഥാനാര്‍ഥിയായി അമേരിക്കന്‍ പ്രസിഡന്റ് സ്ഥാനത്തേക്ക് മത്സരിക്കുമെന്നു പ്രതിക്ഷീക്കുന്ന വൈസ് പ്രസിഡന്റ് ജൊ ബൈഡനെതിരെ ഒരു സ്ത്രീ ഉന്നയിച്ചിരിക്കുന്ന ലൈംഗീകാരോപണത്തിന് പ്രസക്തിയുണ്ടെന്ന് വെര്‍മോണ്ട് സെനറ്റര്‍ ബെര്‍ണി സാന്റേഴ്‌സ്.ബൈഡന്റെ സ്ഥാനാര്‍ഥിത്വത്തെ ചുറ്റിപ്പറ്റി ആഴ്ചകളായി കേള്‍ക്കുന്ന ഈ ആരോപണം ഉന്നയിച്ച സ്ത്രീയുടെ വാദവും നാം കേള്‍ക്കണമെന്നും ബെര്‍ണി അഭിപ്രായപ്പെട്ടു.ഏതെങ്കിലും സ്ത്രീ ലൈംഗീകമായി പീഡിപ്പിക്കപ്പെട്ടു എന്ന് അവര്‍ക്ക് തോന്നിയാല്‍ അവളുടെ അവകാശവാദങ്ങള്‍ കേള്‍ക്കുന്നതിനും അവളോടൊപ്പം നില്‍ക്കുന്നതിനും തയ്യാറാകണമെന്നും ബെര്‍ണി പറഞ്ഞു.
മാത്രമല്ല പൊതുജനത്തിന്റെ മുമ്പില്‍ ഈ വിഷയം അവതരിപ്പിക്കുന്നതിനും അവര്‍ക്ക് അവരുടേതായ ഒരു തീരുമാനത്തിലെത്തുന്നതിനുള്ള അവകാശമുണ്ടെന്നും അദ്ദേഹം കൂട്ടിച്ചേര്‍ത്തു. ബൈഡനെതിരെ ഉന്നയിക്കപ്പെട്ട ലൈംഗീകാരോപണം അദ്ദേഹത്തിന്റെ തിരഞ്ഞെടുപ്പു കമ്മിറ്റി പൂര്‍ണ്ണമായും നിഷേധിച്ചു. 1993 ല്‍ സംഭവിച്ചുവെന്നു പറയപ്പെടുന്ന ഈ സംഭവം ബൈഡന്റെ മുന്‍ സെനറ്റ് സ്റ്റാഫ് നിഷേധിച്ചിട്ടുണ്ട്.