“കൈ കഴുകൂ,മധുരം നുകരൂ”വ്യത്യസ്തമായ ഹാൻഡ് വാഷിംഗ്‌ കോർണർ ഒരുക്കി സി.പി.ഐ.(എം)
സർക്കാരിന്റെ ബ്രേക്ക്‌ ദി ചെയിൻ കാമ്പയിന്റെ ഭാഗമായാണ് കൈകഴുകൽ കേന്ദ്രം സജ്ജീകരിച്ചിരിക്കുന്നത്
കോന്നി: സി.പി.ഐ(എം) കോന്നിത്താഴം ലോക്കൽ കമ്മറ്റിയുടെ നേതൃത്വത്തിൽ പയ്യനാമണ്ണിൽ ഒരുക്കിയിരിക്കുന്ന ഹാൻഡ് വാഷിംഗ്‌ കോർണർ വ്യത്യസ്തതകൾ കൊണ്ട് ശ്രദ്ധേയമാകുന്നു.സംസ്ഥാന സർക്കാരിന്റെ ബ്രേക്ക്‌ ദി ചെയിൻ കാമ്പയിന്റെ ഭാഗമായാണ് കൈകഴുകൽ കേന്ദ്രം സജ്ജീകരിച്ചിരിക്കുന്നത്.കൈ കഴുകൂ,കടമ നിറവേറ്റു,കൈനിറയെ മധുരം നുകരൂ എന്നതാണ് കേന്ദ്രത്തിന്റെ ഹാഷ് ടാഗ്.
പൊതുജനങ്ങൾക്ക് കൈ കഴുകുന്നതിനായി വെള്ളവും ഹാൻഡ് വാഷും സജ്ജമാക്കിയിരിക്കുന്ന കോർണറിൽ കൈകഴുകിയെത്തുന്നവരെ കാത്തിരിക്കുന്നത് മിട്ടായി മുതൽ പഴവർഗ്ഗങ്ങൾ വരെയാണ്. ഇഷ്ടാനുസരണം എടുത്തു കഴിക്കാവുന്ന തരത്തിലാണ് ഇവ ക്രമീകരിച്ചിരിക്കുന്നത്.കോവിഡ് 19 നെ പ്രതിരോധിക്കുന്നതിനൊപ്പം കൈകഴുകൽ പ്രോത്സാഹിപ്പിക്കാൻ കൂടിയാണ് കോർണർ ക്രമീകരിച്ചിരിക്കുന്നതെന്നും ചൂട് കൂടുന്ന പശ്ചാത്തലത്തിൽ പരമാവധി പഴ വർഗ്ഗങ്ങൾ സൗജന്യമായി കോർണറിലൂടെ വിതരണം ചെയ്യുമെന്നും ലോക്കൽ കമ്മറ്റി സെക്രട്ടറി ജിജോ മോഡി പറഞ്ഞു.
കോർണറിന്റെ ഉദ്‌ഘാടനം അഡ്വ.കെ.യു ജെനിഷ് കുമാർ എം.എൽ.എ നിർവഹിച്ചു.ജിജോ മോഡി അധ്യക്ഷത വഹിച്ച യോഗത്തിൽ എം.എസ് ഗോപിനാഥൻ,എ.കുട്ടൻ,മിഥുൻ മോഹൻ,ബിൻസൺ ജോസഫ് എന്നിവർ സംസാരിച്ചു.