സംസ്ഥാനത്ത് എൽപിജി പ്രതിസന്ധി അതിരൂക്ഷം പ്രമുഖ പട്ടണങ്ങളിൽ ഹോട്ടലുകൾ അടച്ചുപൂട്ടി ,ഗാർഹിക സിലിണ്ടറുകളും കിട്ടാനില്ല
ചില ഹോട്ടലുകൾ വിറകടുപ്പിലേക്ക് മാറിയിട്ടുണ്ട്. ഹോട്ടലുകൾ പൂർണമായും പൂട്ടുന്നതോടെ സംസ്ഥാനത്ത് ഭക്ഷണക്ഷാമവും നേരിടാനാണ് സാധ്യത. പാചകവാതക സിലിണ്ടര് പ്രതിസന്ധി രൂക്ഷമായതോടെ 'വര്ക്ക് ഫ്രം ഹോം' സംവിധാനം ഏര്പ്പെടുത്തി ടെക്നോ പാര്ക്ക്
കൊച്ചി| സംസ്ഥാനത്ത് വാണിജ്യ എൽപിജി പ്രതിസന്ധി അതിരൂക്ഷം. കൊച്ചിയിൽ കോഴിക്കോട് തിരുവനതപുരം അടക്കമുള്ള നഗരങ്ങളിലെ 70 ശതമാനത്തോളം ഹോട്ടലുകളും പൂട്ടി. ഗ്യാസ് സിലിണ്ടർ സ്റ്റോക്ക് ഉണ്ടായിരുന്ന ഹോട്ടലുകളും പ്രതിസന്ധിയിലേക്ക് നീങ്ങിയിരിക്കുകയാണ്. ചില ഹോട്ടലുകൾ വിറകടുപ്പിലേക്ക് മാറിയിട്ടുണ്ട്. ഹോട്ടലുകൾ പൂർണമായും പൂട്ടുന്നതോടെ സംസ്ഥാനത്ത് ഭക്ഷണക്ഷാമവും നേരിടാനാണ് സാധ്യത. പാചകവാതക സിലിണ്ടര് പ്രതിസന്ധി രൂക്ഷമായതോടെ ‘വര്ക്ക് ഫ്രം ഹോം’ സംവിധാനം ഏര്പ്പെടുത്തി ടെക്നോ പാര്ക്ക്. വിവിധ കമ്പനികള് ജീവനക്കാർക്ക് വര്ക്ക് ഫ്രം ഹോം പ്രഖ്യാപിച്ചു. പാചകവാതക സിലിണ്ടര് പ്രതിസന്ധി ഹോട്ടല് മേഖലയെയും താമസസ്ഥലങ്ങളെയും ബാധിച്ചു എന്നാണ് ടെക്നോ പാര്ക്ക് പുറത്തിറക്കിയ അറിയിപ്പില് സൂചിപ്പിക്കുന്നത്. മാര്ച്ച് 15 മുതല് 21 വരെ ഒരാഴ്ച വര്ക്ക് ഫ്രം ഹോം ആയിരിക്കും എന്നാണ് അറിയിപ്പ്.വീട്ടാവശ്യത്തിനുള്ള ഗ്യാസ് സിലിണ്ടര് കൃത്യമായി എത്തിക്കുമെന്ന് ആവര്ത്തിക്കുന്ന കേന്ദ്ര സര്ക്കാര് യാതൊരു നടപടിയും സ്വീകരിച്ചിട്ടില്ല .ഗാർഹിക സിലിണ്ടറുകളും കിട്ടാനില്ല .രാജ്യത്ത് ഗ്രാമമേഖലകളില് എല്പിജി ഗ്യാസ് ബുക്കിങ് ഇടവേള 45 ദിവസമാക്കി ഉയര്ത്തിയിട്ടുണ്ട്. പശ്ചിമേഷ്യയില് സംഘര്ഷം തുടരുന്ന സാഹചര്യത്തില് ഇന്ധനക്ഷാമം രൂക്ഷമായതോടെയാണ് എല്പിജി ബുക്കിങ് ഇടവേള 45 ദിവസമാക്കി ഉയര്ത്തിയത്. നഗര മേഖലകളില് എല്പിജി ബുക്കിങ് ഇടവേള 25 ദിവസമായി തന്നെ തുടരും.
കൊച്ചി ഉദയംപേരൂരിലുള്ള പ്ലാൻ്റിൽ നിന്നാണ് സിലിണ്ടർ വിതരണം ചെയ്യുന്നത്. എന്നാൽ പ്ലാൻ്റ് പ്രവർത്തനം നിലച്ചിരിക്കുകയാണ്. ഗാർഹിക സിലിണ്ടർ വിതരണം ചെയ്തിരുന്നുവെങ്കിലും അതും ഏറെക്കുറെ നിലച്ചു. സർക്കാർ തലത്തിൽ ഇടപെടലുകൾ നടത്തുന്നുണ്ടെങ്കിലും കാര്യക്ഷമമല്ല.
അതേസമയം, സിലിണ്ടറുകളുടെ പൂഴ്ത്തിവയ്പ്പും കരിഞ്ചന്തയും തടയാൻ നടപടികളുമായി കേന്ദ്രം രംഗത്തെത്തിയിട്ടുണ്ട്. സംസ്ഥാനങ്ങളിൽ വ്യാപക പരിശോധന നടത്തിവരികയാണ്. അതിനിടെ, ഇന്ധന നികുതി ഒഴിവാക്കണമെന്ന ആവശ്യവുമായി എയർ ഇന്ത്യയും ഇൻഡിഗോയും രംഗത്തെത്തി. കേന്ദ്രത്തോട് ഇളവ് തേടിയതായാണ് സൂചന. അതിനിടെ, പഞ്ചാബിൽ പാചകവാതക സിലിണ്ടറിനായി ക്യൂ നിൽക്കുന്നതിനിടെ 60 കാരൻ കുഴഞ്ഞുവീണ് മരിച്ചു. ബർണാല ജില്ലയിൽ ഇന്നലെയാണ് സംഭവം. സിലിണ്ടറിനായി മണിക്കൂറുകളോളം കാത്ത് നിന്ന ഭൂഷൺ കുമാർ എന്നയാളാണ് വരിയിൽ കുഴഞ്ഞു വീണത്.