കേരളാ ബ്ലാസ്റ്റേഴ്സിന് വീണ്ടും തോല്‍വി

ഐ.എസ്.എല്ലിലെ ഏറ്റവും ആവേശം നിറഞ്ഞ പോരാട്ടത്തിനൊടുവില്‍ കേരളാ ബ്ലാസ്റ്റേഴ്സിന് വീണ്ടും തോല്‍വി. ​ഗോവയുടെ മൈതാനത്ത് നടന്ന മത്സരത്തില്‍‍ രണ്ടിനെതിരെ മൂന്ന് ​ഗോളുകള്‍ക്കാണ് ആതിഥേയര്‍ ബ്ലാസ്റ്റേഴ്സിന് വീഴ്ത്തിയത്. ​ഗോവയ്ക്കായി ഹ്യൂ​ഗോ ബോമസ് രണ്ട് ​ഗോള്‍ നേടി. ജാക്കിചന്ദ് സിങ് ഒരു ​ഗോള്‍ നേടി. ബ്ലാസ്റ്റേഴ്സിനായി ക്യാപ്റ്റന്‍ ബെര്‍ത്തലോമിയോ ഓ​ഗ്ബെച്ചെയും റാഫേല്‍ മെസിബൗളിയുമായണ് വലകുലുക്കിയത്.

​ഗോള്‍നില സൂചിപ്പിക്കും പോലെ തന്നെ മികച്ച പോരാട്ടം നടത്തിയാണ് ബ്ലാസ്റ്റേഴ്സ് കീഴടങ്ങിയത്. ആദ്യ പകുതിയില്‍ രണ്ട് ​ഗോളിന് പിന്നിലായ ബ്ലാസ്റ്റേഴ്സ് പിന്നീട് രണ്ടെണ്ണം തിരിച്ചടിച്ച്‌ ഒപ്പമെത്തിയിരുന്നു. പിന്നീട് 83-ാം മിനിറ്റിലെ ​ഗോളില്‍ ​ഗോവ വിജയം ഉറപ്പിക്കുകയായിരുന്നു.26-ാം മിനിറ്റില്‍ ​ഗോവ ആദ്യ വെടി പൊട്ടിച്ചു. ബ്രണ്ടന്‍ ഫെര്‍ണാണ്ടസ് നീട്ടിനല്‍കിയ പന്ത് ഇടതുപാര്‍ശ്വത്തിലൂടെ കുതിച്ചുകയറിയ മന്ദര്‍റാവു ദേശായിയിലേക്ക്. മന്ദര്‍ ബോകിസിനുള്ളിലേക്ക് നീട്ടിയ കിടിലന്‍ ബോളില്‍ ഒന്നു കാല് നീട്ടേണ്ട പണിയേ ഹ്യൂ​ഗോ ബോമസിനുണ്ടായിരുന്നുള്ളു. ഒന്നാന്തരം ടീം ​ഗോള്‍. ആ​ദ്യ​ഗോളിന് ശേഷവും ​ഗോവ ആധപത്യം തുടര്‍ന്നു.ഇതിനുഫലം അവര്‍ക്ക് ആദ്യ പകുതി അവസാനിക്കും മുമ്ബ് കിട്ടി.

ഇക്കുറി പന്ത് ക്ലിയര്‍ ചെയ്ത് ബ്ലാസ്റ്റേഴ്സ് താരത്തിന് പിഴച്ചു. പന്ത് നേരേ കൊറോയിലേക്ക്. അളന്നുമുറിച്ച്‌ കോറോ നല്‍കിയ ക്രോസില്‍ ജാക്കിചന്ദ് കാല് നീട്ടി. പന്ത് ​ഗോളിലേക്ക് നീങ്ങുമ്ബോള്‍ നോക്കിനില്‍ക്കാനെ ടി.പി.രഹനേഷിനായുള്ളു. ആദ്യ പകുതി അവസാനിക്കും മുമ്ബ് രണ്ട്​ ​ഗോള്‍ ലീ​ഡില്‍ ​ഗോവന്‍ മേധാവിത്വം.

രണ്ട് ​ഗോള്‍ കടത്തില്‍ രണ്ടാം പകുതിയിലിറങ്ങിയ ബ്ലാസ്റ്റേഴ്സിന്റെ മനസില്‍ പദ്ധതികളേറെയുണ്ടായിരുന്നു. തുടര്‍ച്ചയായി ആക്രമിച്ച ബ്ലാസ്റ്റേഴ്സ് 52-ാം മിനിറ്റില്‍ ഒരു ​ഗോള്‍ മടക്കി. വലതുവിങ്ങില്‍ നിന്ന് സെത്യാസെന്‍ നല്‍കിയ നല്‍കിയ പാസ് ബോക്സിന് മുന്നിലുള്ള ഓ​ഗ്ബെച്ചെയിലേക്ക്. കിടിലന്‍ ടച്ചിലൂടെ ബോക്സിലേക്ക് കുതിച്ചുകയറിയ മെസിയിലേക്ക്. മെസിയുടെ ഇടങ്കാല്‍ ഷോട്ട് വലകുലുക്കി. വീണ്ടും ആക്രമിച്ച്‌ സമനിലയ്ക്ക് ശ്രമിച്ച ബ്ലാസ്റ്റേഴ്സിന് 69-ാം മിനിറ്റില്‍ ആശ്വാസനിമിഷം. സിഡോ എടുത്ത കോര്‍ണര്‍കിക്കില്‍ ഉയര്‍ന്നുചാടി തലവച്ച ഓ​ഗ്ബെച്ചെയ്ക്ക് പിഴച്ചില്ല. ബ്ലാസ്റ്റേഴ്സ് ഒപ്പം. ബ്ലാസ്റ്റേഴ്സ് ഒപ്പമെത്തിയതോടെ ​ഗോവ ആക്രമണം ശകതമാക്കി. തുടര്‍ആക്രമണങ്ങളുടെ ഫലമായി 83-ാം മിനിറ്റില്‍ ​ഗോവ ലീഡ് തിരിച്ചുപിടിച്ചു. മൊറോക്കന്‍ മിഡ്ഫീല്‍ഡ് ജനറല്‍ അഹമ്മദ് ജഹു നല്‍കിയ് നീളന്‍ പന്തില്‍ ബോമസിന്റെ കിടിലന്‍ ഷോട്ട്. ഷോട്ട് തടുക്കുന്നില്‍ രഹനേഷിന്റെ പിഴവും കൂടിച്ചേര്‍ന്ന് പന്ത് വലയിലേക്ക്. ​ഗോവയ്ക്ക് ആവേശജയവും.