ഡല്ഹി സേക്രഡ് ഹാര്ട്ട് ദേവാലയത്തില് കുരുത്തോല പ്രദക്ഷിണത്തിനുള്ള അനുമതി നിഷേധിച്ച് പൊലീസ്
കുരുത്തോല പ്രദക്ഷിണം ഒഴിവാക്കി വിശ്വാസികളോട് നേരിട്ട് പള്ളിയില് എത്താന് ആഹ്വാനം ചെയ്തു. പൊലീസ് നടപടിയില് ഡല്ഹി അതിരൂപതയുടെ കാത്തലിക് അസോസിയേഷന് അഗാതമായ വേദനയും നിരാശയും പ്രകടിപ്പിച്ചു.
ഡൽഹി | ഡല്ഹി സേക്രഡ് ഹാര്ട്ട് ദേവാലയത്തില് കുരുത്തോല പ്രദക്ഷിണത്തിനുള്ള അനുമതി നിഷേധിച്ച് പൊലീസ്. സുരക്ഷാ പ്രശ്നങ്ങള് ചൂണ്ടിക്കാണിച്ചാണ് അനുമതി നിഷേധിച്ചത്. സെന്റ് മേരീസ് പള്ളിയില് നിന്ന് സേക്രഡ് ഹാര്ട്ട് ദേവാലയത്തിലേക്കായിരുന്നു പ്രദക്ഷിണം ഉദ്ദേശിച്ചിരുന്നത്.ഓശാന തിരുനാളിനോട് അനുബന്ധിച്ചുള്ള
കുരുത്തോല പ്രദക്ഷിണം ഒഴിവാക്കി വിശ്വാസികളോട് നേരിട്ട് പള്ളിയില് എത്താന് ആഹ്വാനം ചെയ്തു. പൊലീസ് നടപടിയില് ഡല്ഹി അതിരൂപതയുടെ കാത്തലിക് അസോസിയേഷന് അഗാതമായ വേദനയും നിരാശയും പ്രകടിപ്പിച്ചു.
പൊലീസിന്റെ തീരുമാനത്തെ അംഗീകരിക്കുന്നുവെന്ന് ഇടവക വികാരി ഫാ. ഫ്രാന്സിസ് സ്വാമിനാഥന് പറഞ്ഞു. കഴിഞ്ഞ 15 വര്ഷമായി കുരിശിന്റെ വഴി ഓശാന ഞായര് ദിനം നടത്താറുണ്ടെന്നും അദ്ദേഹം ചൂണ്ടിക്കാട്ടി. രണ്ടായിരത്തോളം വിശ്വാസികള് പങ്കെടുക്കാറുണ്ടെന്നും കുറച്ചു വര്ഷങ്ങള്ക്കു മുന്പും സമാനമായി അനുമതി നിഷേധിച്ചിട്ടുണ്ടെന്നും അദ്ദേഹം പറഞ്ഞു. ഇന്ന് രാവിലെയാണ് പൊലീസ് ഇത്തരത്തില് പ്രദക്ഷിണത്തിന് അനുമതി നിഷേധിച്ചത്.
അതേസമയം ഡല്ഹി സേക്രഡ് ഹാര്ട്ട് പള്ളിയില് കുരുത്തോല പ്രദക്ഷിണത്തിന് അനുമതി നിഷേധിച്ചത് പ്രതിഷേധാര്ഹമെന്ന് മുഖ്യമന്ത്രി പിണറായി വിജയന്. ഭരണഘടന ഉറപ്പ് നല്കുന്ന മതസ്വാതന്ത്ര്യത്തിന്റെയും മതനിരപേക്ഷ മൂല്യങ്ങളുടെയും ലംഘനമാണിതെന്ന് മുഖ്യമന്ത്രി പറഞ്ഞു. ന്യൂനപക്ഷങ്ങളുടെ മതവിശ്വാസങ്ങള് ഹനിക്കുന്ന ഇത്തരം നടപടികള് ബഹുസ്വര സമൂഹത്തിന് ചേര്ന്നതല്ലെന്നും മുഖ്യമന്ത്രി വ്യക്തമാക്കി.