ഇടുക്കിയിൽ വീണ്ടും കാട്ടാന ആക്രമണം. ചിന്നക്കനാൽ 301 കോളനിയിലെ ഷെഡ് അരിക്കൊമ്പൻ ഒറ്റയാൻ തക‍ർത്തു

ഇടുക്കി| ഇടുക്കിയിൽ വീണ്ടും കാട്ടാന ആക്രമണം. 301 കോളനിയിലെ ഷെഡ് അരിക്കൊമ്പൻ എന്ന് പേരുളള ഒറ്റയാൻ തക‍ർത്തു. പുലർച്ചെ നാല് മണിക്കായിരുന്നു അരിക്കൊമ്പൻ്റെ ആക്രമണം. ഷെഡിലുണ്ടായിരുന്ന യശോധരൻ എന്നയാൾ രക്ഷപെട്ടു. ആന വരുന്നത് കണ്ടയുടൻ ഇയാൾ അടുത്തുളള അം​ഗൻവാടി കെട്ടിടത്തിലേക്ക് ഓടിക്കയറുകയായിരുന്നു. ഇടുക്കി ശാന്തൻപാറ പന്നിയാർ എസ്റ്റേറ്റിൽ അരിക്കൊമ്പൻ കഴിഞ്ഞ ദിവസം റേഷൻ കട തകർത്തിരുന്നു. റേഷൻകട തകർത്തശേഷം കടയിലെ വസ്തുക്കൾ കഴിക്കുന്നതാണ് ആനയുടെ രീതി. കഴിഞ്ഞ ഒരു വർഷത്തിനിടെ പതിനൊന്ന് തവണ ആന ഈ കട തകർത്ത് അരിയടക്കമുളളവ തിന്നിരുന്നു. രണ്ടാഴ്ചക്ക് മുമ്പ് ആന ജനവാസമേഖലയിൽ ഇറങ്ങി രണ്ട് വീടുകൾ നശിപ്പിച്ച് അരിയെടുത്ത് ഭക്ഷിച്ചിരുന്നെന്നും നാട്ടുകാർ പറയുന്നു. എന്നാൽ ആന ഇതുവരെ ആളുകളെ ആക്രമിച്ചിട്ടില്ല.